ശൈഖുനാ കണിയാപുരം അബ്ദുറസാഖ് മസ്താൻ വലിയുല്ലാഹി (റ)

🌹അജ്മീർ ഖാജാ :ഔലിയാക്കളിലെ സുഗന്ധരാജ❤ ഭാഗം 2
                 

അല്ലാഹു അജ്മീർ ഖാജയുടെ ബർക്കത്ത് കൊണ്ട് നമ്മെ അനുഗ്രഹിക്കട്ടെ....

യാ.... ഖാജാ..... നമ്മെ പരിഗണിക്കണേ...

യാ... ഖാജാ..... നമ്മെ സഹായിക്കണേ.....

യാ... ഖാജാ.... നമ്മെ രക്ഷിക്കണേ.......


അഹ്ലുൽ ബൈത്തിലെ ഹുസൈനി തായ് വഴിയിൽ ഉൾപ്പെടുന്ന സുൽത്താനുൽ ഹിന്ദ് ഖാജാ മുഈനുദ്ധീൻ ചിശ്തി قدس الله سره العزيز ഖുറാസാൻ പ്രവിശ്യയിലെ "സൻഞ്ചർ " ഗ്രാമത്തിൽ ഹിജ്റ അഞ്ഞൂറ്റി മുപ്പതിലാണ് ജനിക്കുന്നത്. പിതാവായ സയ്യിദുനാ ഗിയാസുദ്ധീൻ (غياث الدين ) رضي الله عنه  പ്രവാചക പൗത്ര പരമ്പരയിലെ പതിമൂന്നാമത്തെ കണ്ണിയാണ്.

ശൈഖ് ഖാജാ മുഈനുദ്ധീൻ (ഖ.സി) തങ്ങളുടെ പതിനഞ്ചാം വയസ്സിൽ പിതാവ് ഗിയാസുദ്ധീൻ رضي الله عنه വഫാത്താകുകയും തൻറെ പിതാവിൽ നിന്ന് അനന്തര സ്വത്തായി ലഭിച്ച ഒരു ഈത്തപ്പഴ തോട്ടവുമായി ബന്ധപ്പെട്ട ജീവിതവൃത്തിയുമായി കഴിയുന്നവസരത്തിലാണ്, ഖാജാ قدس الله سره العزيز തങ്ങളുടെ തന്നെ ജീവിതത്തിന്ന് വഴിത്തിരവായി ഭവിച്ചതും ഖാജാ قدس الله سره العزيز  തങ്ങളുടെ ജീവിതത്തിൽ വൻ മാറ്റങ്ങൾക്ക് ഹേതുവായതുമായ മജ്ദൂബ് ശൈഖ് ഇബ്റാഹീം ഖൽദൂസി رضي الله عنه വിൻറെ ആകസ്മികമായ കടന്നുവരവ്.

ഔലിയാക്കളിലെ അത്യുന്നതരായ ശൈഖ് ഇബ്രാഹീം ഖൻദൂസി رضي الله عنه നെ ഖാജാ قدس الله سره العزيز ഊഷ്മളമായി സ്വീകരിക്കുകയും തൻറെ തോട്ടത്തിലെ പഴങ്ങൾ നൽകി സൽക്കരിക്കുകയും ചെയ്തു. ശൈഖ് ഖൻദൂസി رضي الله عنه  ഖാജാ  قدس الله سره العزيز തങ്ങളുടെ ആതിഥ്വം സന്തോഷത്തോടെ സ്വീകരിച്ചു . ഖാജാ رضي الله عنه നൽകിയ ഈത്തപ്പഴം ഭക്ഷിക്കുകയും ചെയ്തു. തുടർന്ന് ഖൻദൂസി رضي الله عنه  തൻറെ ഭാണ്ഡത്തിൽ നിന്ന് ഒരുണങ്ങിയ റൊട്ടിക്കഷ്ണമെടുത്ത് തൻറെ വായിലിട്ട് ചമച്ചതിന് ശേഷം സയ്യിദുനാ ഖാജാ  قدس الله سره العزيز ന്ന് ഭക്ഷിക്കാനായി കൊടുത്തു . ഖാജയത് ഭക്ഷിക്കേണ്ട താമസം തന്നിൽ ആത്മീയമായ വമ്പിച്ച മാറ്റങ്ങൾക്ക് നാന്ദി കുറിക്കപ്പെടുകയായിരുന്നു. തന്നിൽ എന്തെന്നില്ലാത്ത അതിശക്തമായ പരിത്യാഗ മനോഭാവവും അതുല്യമായ സൂഷ്മതയും ഭക്തിയും കരകവിഞ്ഞൊഴുകാൻ തുടങ്ങി.

ഒടുവിൽ തൻറെ ഈത്തപ്പഴം തോട്ടം ദരിദ്രർക്കും അഗതികൾക്കുമായി വഖഫ് ചെയ്തു കൊണ്ടാണ് ആത്മീയന്വേഷകനായി പിറന്ന വീടും കളിച്ചു നടന്ന നാടും തൻറെ സർവ്വ സ്വത്തുക്കളും ഉപേക്ഷിച്ചു , കാലം കാത്തിരുന്ന സൻമാർഗ കേന്ദ്രമായും വിലായത്തിൻറെ ഉറവയായും ഖാജാ قدس الله سره العزيز - വിൽ അനുദിനം പരിണമിക്കുന്ന ആശ്ചര്യകരമായ വൻ മാറ്റങ്ങളുടെ തുടക്കവും തുടർന്ന് ആത്മജ്ഞാന സാഗരങ്ങളായ സൂഫിയാക്കാളെ അന്വേഷിച്ചുള്ള ഖുറാസാനിലേക്കും പിന്നീട് ബുഖാറയിലേക്കുമുള്ള പ്രഥമ യാത്രകളുടെ നാന്ദിയും കുറിക്കപ്പെടുന്നത്.

ബുഖാറയിൽ വെച്ചായിരുന്നു അക്കാലത്തെ വിശ്വാത്തര പണ്ഡിത പ്രതിഭയും ആരിഫുമായ ശൈഖ് ഹുസാമുദ്ധീൻ ബുഖാരി رحمة الله عليه തങ്ങളുമായി സന്ധിക്കുന്നതും ആ മഹാ പ്രതിഭയിൽ നിന്ന് ഖുർആൻ, ഹദീസ്, ഫിഖ്ഹ് തുടങ്ങിയ അറിവിൻറെ വിഭിന്നങ്ങളായ ശാഖകളിൽ പ്രാഗൽഭ്യവും വ്യുൽപ്പത്തിയും കരസ്ഥമാക്കുന്നതും. ഒഴിവു വേളകളിൽ ബുഖാറയിലും ഖുറാസാനിലും അക്കാലത്ത് ജീവിച്ചിരിക്കുന്ന ഔലിയാക്കളെ സന്ദർശിച്ചും  മഖ്ബറകളിൽ സിയാറത്തുകൾ നടത്തിയും ജ്ഞാനത്തിൻറേയും മുറാഖബകളുടേയും അനവരത പ്രയത്നങ്ങൾക്കിടയിൽ ലോകൈക നാഥനായ അള്ളാഹുവിൽ നിന്നുള്ള ഇൽഹാം പ്രകാരം ഹാറൂൺ പട്ടണത്തെ ലക്ഷ്യമിടുന്നതും താൻ സർവ്വവും അർപ്പിച്ച ചിശ്തി സരണിയിലെ ഖുതുബും ശൈഖുൽ മശായിഖുമായ ഉസ്മാൻ ഹാറൂനീ رضي الله عنه തങ്ങളുടെ ശിഷ്യത്വം സ്വീകരിക്കുന്നതും.

പിന്നീട് ഗരീബ് നവാസോളം അതാഉളളാഹി വ അതാഉർറസൂലോളം  (അള്ളാഹുവിൻറെയും അവൻറെ ദൂതൻറേയും വരദാനം) ഇന്ത്യൻ ഉപഭൂഖണ്ഡത്തിൻറെ സമ്പൂർണ്ണ വിലായത്തധികാരിയോളം പരിണമിക്കുന്ന സുന്ദരവും അവാച്യവും സ്തുതീർഹവുമായ മഹത് പരിണാമങ്ങൾക്ക് വിധേയമാക്കപ്പെടുന്ന സംഭവ ബഹുലമായ സുൽത്താനുൽ ഹിന്ദിൻറെ സംബൂർണ്ണവും പരിപക്വവുമായ ജൈത്രയാത്രയുടെ വിജയരഥത്തേര് തെളിക്കുന്ന ജീവിത ഗാഥ ആരംഭിക്കുന്നത്.

"അജ്മീര്‍ ഖാജാ അവര്‍കള്‍ക്ക് തന്‍റെ ആത്മീയ ഗുരുവായ ശൈഖ് ഉസ്മാന്‍ ഹാറൂനി  رضي الله عنه അവര്‍കളോട് അതിയായ ആദരവാണ്. ഖാജാ قدس الله سره العزيز അവര്‍കളോട് നാം എന്ത് കാര്യം ചോദിക്കുമ്പോഴും ഉസ്മാന്‍ ഹാറൂനി رضي الله عنه  അവര്‍കളുടെ പേര് പറഞ്ഞു കൊണ്ട് ചോദിക്കണം. അപ്പോള്‍ ഖാജാ قدس الله سره العزيز അവര്‍കള്‍ അത് നിരസിക്കില്ല. അത് കൊണ്ടാണ് അവിടെയുള്ള ഖാദിമുകള്‍ ഖാജാ رضي الله عنه വിൻറെ ഹള്റത്തില്‍ വെച്ച് ദുആ ചെയ്യുമ്പോള്‍ ഉസ്മാന്‍ ഹാറൂനി رضي الله عنه അവര്‍കളെ കൊണ്ട് തവസ്സുല്‍ ചെയ്തു ദുആ ചെയ്യുന്നതും ഇസ്തിഗാസ ചെയ്യുമ്പോള്‍ ഉസ്മാന്‍ ഹാറൂനി  رضي الله عنه വിൻറെ പേരില്‍ ഖാജാ قدس الله سره العزيز തങ്ങളോട് അപേക്ഷിക്കുന്നതും" അശൈഖ് ഉസ്മാൻ ഹാറൂനീ رضي الله عنه തങ്ങളും ഖാജാ قدس الله سره العزيز ഉം തമ്മിലുള്ള ഊഷ്മളവും ഉൽകൃഷ്ട്ടവുമായ ആത്മ ബന്ധത്തിൻറേയും വിവരണാതീതമായ ആദരവിൻറെയും അലിഖിതമായ നിദർശനമത്രെ....

ഖാജാ മുഈനുദ്ധീൻ ചിശ്തി قدس الله سره العزيز  തങ്ങൾ ഇരുപത് വർഷക്കാലത്തോളം ശൈഖുൽ മശായിഖ് ഉസ്മാനുൽ ഹാറൂനി رضي الله عنه തങ്ങളുടെ കീഴിലായി തസ്കിയ്യത്തിൻറേയും തർബിയ്യത്തിൻറേയും മുജാഹദകളുടേയും കഠിനമായ അനവധി പരീക്ഷണങ്ങൾക്കൊടുവിൽ സമ്പൂർണ്ണമായ ആത്മീയ വിജയങ്ങൾ കൈവരിച്ചു. ഒരു ദിവസം ശൈഖ് ഹാറൂനി  رضي الله عنه ഖാജാ قدس الله سره العزيز തങ്ങളെ വിളിച്ചു പറഞ്ഞു:.... " മുഈനുദ്ധീൻ.... നിൻറെ വുളുവിനെ പുതുക്കുക, ശേഷം രണ്ടു റഖ്അത്ത് സുന്നത്ത് നിസ്ക്കരിക്കൂ, ആദ്യത്തെ റഖ്അത്തിൽ ഫാത്തിഹക്ക് ശേഷം ആയിരം സൂറത്തുൽ ഇഖ്ലാസും രണ്ടാം റഖ്അത്തിൽ ആയിരം ഫാത്തിഹക്ക് ശേഷം സൂറത്തുൽ ഇഖ് ലാസ് ഒരു പ്രാവശ്യം ഓതുക, നിസ്ക്കാരത്തിന്ന് ശേഷം റസൂൽ (സ) തങ്ങളുടെ മേൽ നൂറ്റൊന്ന് സ്വലാത്തും ചൊല്ലുക "

ശൈഖ് തങ്ങളുടെ നിർദ്ദേശാനുസരണം ഖാജാ പ്രവർത്തിക്കുകയും ചെയ്തപ്പോൾ, ശൈഖ് ഹാറൂനി رضي الله عنه  തങ്ങൾ പറഞ്ഞു:.... "يا معين الدين إنك وصلت الآن إلى مقعد صدق عند مليك مقتدر  അല്ലയോ മുഈനുദ്ധീൻ  താങ്കളീയവസരത്തിൽ സർവ്വാധിനാഥൻറെയടുക്കൽ സത്യസന്ധമായ സ്ഥാനത്തെ കൈവരിച്ചവരായിരിക്കുന്നു". റസൂൽ صلى الله عليه وسلم തങ്ങൾക്ക് അല്ലാഹുവിൻറെയടുക്കലുള്ള അത്യുന്നതമായ സ്ഥാനമാണല്ലോ "മഖാമൽ മഹ് മൂദ് "..( المقام المحمود). അതേ പ്രകാരം ഔലിയാക്കളിലെ അത്യുന്നതരായ മഹത്തുക്കളിൽ അത്യപൂർവ്വക്കാർക്ക് മാത്രം ലഭിക്കുന്ന ഇലാഹിയായ സ്ഥാനമാണ് " മഖ്അദു സ്വിദ്ഖ്"... ( مقعد صدق).

വിശുദ്ധമായ ത്വരീഖത്തിൻറെ സ്ഥാന വസ്ത്രങ്ങൾ അണിയിച്ചു കൊണ്ട് ശൈഖു ഹാറൂനി തങ്ങൾ رضي الله عنه  വീണ്ടും സയ്യിദുനാ ഖാജാ തങ്ങളോട് വീണ്ടും ഒരു ദിവസം കൂടി ഏകാന്തതയിലും രിയാളകളിലുമായി ആയിരം തവണ സൂറത്തുൽ ഇഖ്ലാസ് ഓതി തീർക്കാൻ കൽപ്പിക്കുകയും ചെയ്തു. ശൈഖ് തങ്ങളുടെ കൽപ്പന നിർദ്ദേശം ശിരസ്സാവഹിച്ച ഖാജാ തങ്ങൾ അതും പൂർത്തിയാക്കിയതിന്ന് ശേഷം ശൈഖ് ഹാറൂനി  ضي الله عنه തങ്ങളുടെ സമീപത്തേക്ക് ചെന്ന ഖാജാ قدس الله سره العزيز  തങ്ങളോട് ശൈഖവർകൾ പറഞ്ഞു:..." മുഈനുദ്ധീൻ, താങ്കൾ ആകാശത്തേക്ക് നോക്കൂ", ആശ്ചര്യകരമെന്ന് പറയട്ടെ... അല്ലാഹുവിൻറെ അർശും കുർസും, മഹാ പ്രപഞ്ചത്തിൻറെ രഹസ്യങ്ങളുടെ കലവറകളെല്ലാം തന്നെ ഖാജാ قدس الله سره العزيز തങ്ങൾക്ക് മുന്നിൽ എല്ലാ വിധ മറകളെയും നീക്കം ചെയ്യപ്പെട്ടു നഗ്നനേത്രങ്ങൾക്കൊണ്ടു തന്നെ കാണിക്കപ്പെടുകയായിരുന്നു.: ശേഷം, ഇതേ പ്രകാരം ഭൂമിയിലേക്ക് നോക്കാനും ശൈഖവർകളിൽ നിന്ന് നിർദ്ദേശമുണ്ടായി. അവിടെയും അൽഭുതങ്ങളുടെ മഹാ ഖനികളാണ് സുൽത്താനുൽ ഹിന്ദ് ഖാജാ قدس الله سره العزيز  തങ്ങൾക്ക് മുന്നിൽ പ്രദർശിപ്പിക്കപ്പെട്ടത്.

ലോകത്തിൻറെ വലിയൊരു പ്രദേശത്തിൻറെ ഗതിവിഗതികളെ നിയന്ത്രിക്കേണ്ട പരുവത്തിലേക്ക് ഖാജാ قدس الله سره العزيز  പരിണമിപ്പിക്കുകയും പര്യാപ്തമാക്കുകയുമാണിവിടെ. സാക്ഷാൽ ദൃഢതയുടെ സമ്പൂർണ്ണതയിലേക്കുള്ള പ്രയാണമാണിവിടെ സംഭവിക്കുന്നത്. ഖാജാ  قدس الله سره العزيز തങ്ങളുടെ വരുംകാല സഞ്ചാരങ്ങളിൽ വന്നു ഭവിക്കാവുന്ന ആപൽക്കരവും അതികഠിനമായ യാതനകളേയും അതിശക്തമായ പ്രതിസന്ധികളെയും തരണം ചെയ്യാനുള്ള മാനസിക-ആത്മീയ കരുത്തുകളെ വാർത്തെടുക്കുന്നവയാണ് യഥാർത്ഥത്തിൽ ഈ കാഴ്ച്ചകളും രഹസ്യങ്ങളുടെ മൂടുപടങ്ങളെ അഴിച്ചു മാറ്റുന്നതിലുമുള്ള കാതൽ.

വിശുദ്ധ ഖുർആനിൽ ഖലീലുള്ളാഹി ഇബ്രാഹീം നബി عليه الصلوة و السلام  നെ സംബന്ധിച്ചു അല്ലാഹു പറയുന്നു:...."

 وَإِذِ ابْتَلَى إِبْرَاهِيمَ رَبُّهُ بِكَلِمَاتٍ فَأَتَمَّهُنَّ قَالَ إِنِّي جَاعِلُكَ لِلنَّاسِ إِمَاماً "

"നബിയെ തങ്ങൾ സ്മരിക്കുക...,ഇബ്രാഹീമിനെ തൻറെ നാഥൻ ചില കാര്യങ്ങളെക്കൊണ്ട് പരീക്ഷിക്കുകയും അവയെല്ലാം വിജയകരമായി പൂർത്തിയാക്കുകയും ചെയ്തപ്പോൾ, അല്ലാഹു പറഞ്ഞു "നിശ്ചയം നിന്നെ ഞാൻ ജനങ്ങൾക്ക് നേതാവായി നിശ്ചയിച്ചിരിക്കുന്നു"

അതി ഗഹനമായ അല്ലാഹുവിൻറെ അമാനത്താണല്ലോ പരിശുദ്ധമായ ദീനുൽ ഇസ്‌ലാം. ഇസ്‌ലാമിൻറെ പ്രചാരകരായി വരുന്ന മുർസലീങ്ങൾക്കും അകാബീറുൽ ഔലിയാക്കളായ മശായിഖന്മാർക്കും അനവധി ഫിർഔനകളെയും നംറൂദുമാരേയും അബൂ ജാഹിലുകളേയും അഭിമുഖീകരിക്കേണ്ടതുണ്ട്.നിരവധി ബദറും ഉഹദും തരണം ചെയ്യേണ്ടതുമുണ്ട്. ഇവയെ തൃണ സമാനം കാണാനുള്ള മാനസിക ദൃഢത നേടിയെടുക്കാനുള്ള പരിശീലനക്കളരികളാണ് മുജാഹദകളിലൂടെ നീണ്ടക്കാലം കൊണ്ട് നേടിയെടുക്കുന്ന അസ്മും ( عزم) തവക്കുലും. രഹസ്യ ദർശനങ്ങളിലൂടെ സ്വയത്തമാക്കുന്ന ദൃണ്ഡതകളും.

ശൈഖ് ഹാറൂനി رضي الله عنه വീണ്ടും മേൽ പ്രകാരം ഏകാന്തതയിലിരുന്നു സൂറത്തുൽ ഇഖ് ലാസ് ആയിരം തവണ ചൊല്ലി തീർക്കാൻ നിർദ്ദേശം നൽകുകയുണ്ടായി. അവയും ഖാജാ മുഈനുദ്ധീൻ മുഈനുൽ ഹഖ് رضي الله عنه  പൂർത്തിയാക്കുകയും ശേഷം ശൈഖവർകളെ സമീപിക്കുകയും ചെയ്തപ്പോൾ ശൈഖവർകൾ ഇരുകണ്ണുകളടച്ചിരിക്കാൻ നിർദ്ദേശം കൊടുത്തു പറഞ്ഞു:..." കണ്ണുകൾ തുറക്കൂ, എന്തെക്കെയായിരുന്നു നീ ദർശിച്ചത് "...? ഖാജാ رضي الله عنه  വളരെ ഭവ്യതയോടെ പ്രതിവചിച്ചു:.." പതിനെട്ടു ലോകങ്ങളെയും ഞാൻ ദർശിച്ചു "... ശൈഖുൽ മശായിഖ് ഉസ്മാനുൽ ഹാറൂനി رضي الله عنه പുഞ്ചിരിച്ചു കൊണ്ട് മൊഴിഞ്ഞു:..." മുഈനുദ്ധീൻ, നിങ്ങളുടെ സർവ്വവും പൂർത്തിയായി കഴിഞ്ഞിരിക്കുന്നു ". തുടർന്ന് ഒരു ചെറിയ പാറക്കല്ലെടുത്തു ഖാജാ തങ്ങളുടെ കയ്യിൽ വെച്ചു കൊടുക്കേണ്ട താമസം, അവ സ്വർണ്ണമായി മാറിയിരുന്നു. തുടർന്ന് ശൈഖവർകൾ പറഞ്ഞു:..." ഇതുമായി നീ പോകണം, നിൻറെയടുക്കലുള്ള ദരിദ്രർക്കും അഗതികൾക്കുമായി ഇവയിൽ നിന്ന് ചെലവാക്കിക്കൊള്ളണം". ആശ്ചര്യമെന്ന് പറയട്ടെ: ഖാജാ قدس الله سره العزيز അജ്മീറിൽ എത്തി തൻറെ നൂറ്റി രണ്ടാം വയസ്സിൽ വഫാത്താകുന്നത് വരെ ശൈഖ്  ഉസ്മാനുൽ ഹാറൂനി رضي الله عنه  തങ്ങൾ ഏൽപ്പിച്ച അനുഗ്രഹീതമായ ആ അക്ഷയ നിധിയിൽ നിന്നായിരുന്നു തൻറയടുക്കലുള്ള പതിനായിരക്കണക്കിന്ന് വരുന്ന മുരീദന്മാർക്കും ഫഖീറന്മാർക്കുമുള്ള നിത്യ ചെലവിനുള്ള വിഹിതം കണ്ടെത്തിയിരുന്നത്......! (തുടരും)

يَا سَيِّدِي مَدَدِي سَنَدِي وَيَا عُدَدِي..... ❤
مُؤَيِّدِي مُدَدِي عَمَدِي عَلَي شِدَدِي.......❤
مُشَيِّدِي سُودَدِي عَضُدِي بِلاَ عَدَدِي....❤
کُنْ آخِذًا بِيَدِي خَاجَا مُعِينَ الدِّينِ..... ❤

എൻ യജമാനൻ, സഹായഹസ്തം
ഇഹത്തിലെന്നവലംബം പരത്തിലെന്നാസ്തിയും
യാതന പെയ്യവേ ശക്തിയായ് രക്ഷയായ്
അവലംബമാം കുടനിഴലായ്‌
അപരിമേയം വർഷിക്ക വെട്ടവും വഴിതാരും
കരം ഗ്രഹിച്ചാലും വിഭോ,
ശക്തിയായ് ശേഷിയായ് നിറഞ്ഞാലും ഖാജാ.

Copye